top of page

流行減肥迷思- 蔬果汁斷食大法


近日坊間流行一種蔬果汁斷食大法,聲稱可以令腸胃休息,並有好驚人嘅修身效果,有試驗者聲稱60日減左足足60磅,相信大家聽到都好心動,我地由營養師拆解下呢個方法啦。

呢種蔬果汁斷食法需要連續60日進行,期間唔可以有任何一日停止,開始斷食前一個星期亦要食得清淡,特別係盡量少食肉,慢慢連奶類製品都唔好食,讓身體適應。而呢60日可以食(正確黎講係飲)嘅野就只有「蔬果汁」,蔬果汁當中最少要有70%係蔬菜,其他係水果。

各款蔬果汁每杯平均只有200 kcal,每日三餐只係飲蔬果汁,一日只係攝取600 kcal咁少,當然會有效果啦,視乎番本身嘅體重,如果係身形較為龐大,減60磅絕對係有可能,唔係吹水! 但60磅入面除左脂肪,亦包含咗一定份量嘅肌肉。我地身體嘅基本蛋白質需求為每公斤0.8 g,即係話例如一個重100 kg嘅人,每日就需要80 g蛋白質,長期攝取不足便會導致肌肉流失。蛋白質主要來源為肉類、魚類、海鮮類、奶類等,蔬果汁斷食法事前已經要減少進食呢類食物,而蔬果類本身亦含有非常少蛋白質,2個多月持續缺乏,身體必定有大量肌肉流失,呢樣亦係體重可以跌得咁快嘅原因。

蔬果汁斷食法同時亦缺乏了多種營養素,例如維他命B12、維他命D、鐵質、鋅、DHA、鈣質等等,長期缺乏可導致貧血、記憶力衰退、免役力下降、骨質疏鬆等問題,所以大家千其唔好亂試呀。



1,749 次查看
bottom of page